Ang Kritika

Sa simpleng kahulugan, ang kritika ay pagsusuri na/ng may sinasabi.  Inilalatag ko rito isa-isa ang paghimaymay sa bawat salita’t katagang bumubuo sa nasabing kahulugan—“pagsusuri,” “suri,” “uri,” “na may sinasabi,” “ng may sinasabi,” “nang may sinasabi,” “may sinasabi,” at “sinasabi.” Ang ganitong gawain ay matagal ko nang tinawag na pagdalumat-salita. Kaakibat ng  pagdalumat-salita ng “kritika” ay ang pagtukoy sa  iba’t ibang anyo ng kritika tulad ng kritika-sabisabi, kritika-tabitabi, kritika-pasintabi, at kritikasatabitabi batay sa tradisyon ng kritika sa bansa mula sa praktika ng pagbasa, pagsusuri, at pagdalumat ng mga kritiko, iskolar, at manunulat na malay din sa mundo at diskurso ng kritika—galing man ito sa labas o loob ng bansa. Ito ang aking ambag sa mundo ng Kritikang Filipino na maaaring gamitin ng sinumang iskolar, kritiko, manunulat, at mag-aaral sa kanilang iba’t ibang diskurso, larangan, pagdalumat, at pagkritika. Hangad kong sa munting ambag na ito ay lalong higit pang umunlad ang intelektuwalisasyon ng Wikang Filipino at Araling Filipino.